PS Digimon World 數碼暴龍世界 攻略 Part 2 疑似賣豬仔騙案與苦力訓練

故事開端…

一名頭戴冷帽嘅日本小學雞生，同同學們喺公園玩完磚機之後返屋企…情節唔多描述，睇片完全明白，之後就畀部磚機吸咗入去數碼世界。而哩個世界嘅大舞台就係「檔案島」哩片大陸。而吸小學雞生入嚟果位，正正係數碼世界最年長嘅長老：爺爺獸。爺爺獸話佢骨格精奇，係練武好材料，所以吸咗佢過嚟…廢話唔多講，總之佢係「被選中嘅細路」，所以吸咗佢入去，而你哩位玩家同樣係「被選中嘅細路」，一齊去努力啦！

根據爺爺獸講，檔案島突然巨變，全部數碼暴龍都失咗常，要求我(哋)「被選中嘅細路」可以幫手去收拾復佢哋，當然「被選中嘅細路」係充滿熱血同對哩個世界有大愛，所以只要係正義果一方，一定義無反顧，在所不辭，水裏水裏去，火裏火裏去…

就咁，爺爺獸畀兩個選擇我揀(比某精靈遊戲一開始三選一少咗一個)：
①揀「日」會係亞古獸，
②揀「夜」會係加布獸。

之後就係爺爺獸同各幼年時期嘅數碼暴龍同大家講解一下遊戲一啲資訊，識日文可以睇下，唔識日文都要同佢哋傾下，因為一開始會有各種初始道具會送出，而且部份事件嘅觸發，更需要同「開始之街」嘅各種數碼暴龍傾偈，先可以引發事件去解各種任務。

***以下只係建議令數碼暴龍加入返回開始之街嘅次序, 可以唔跟, 但係因為某啲數碼暴龍加入嘅故事，有觸發條件，所以一發現進度停滯，或者無事件觸發，要睇返之前果啲事件有無解到***

1) 亞古獸
一出開始之街，去到野外第一個版圖，亞古獸會自動走埋嚟，第一隻，而且係需要有咩情節要處理，要佢加入亦好簡單，直接打贏佢會加入，喺爺爺獸屋傍邊開「數碼倉庫」，可以將道具箱放唔晒嘅道具存放入去。

2) 巴魯獸
打完亞古獸向下進發，係公共廁所下面版圖見到巴魯獸種?咗喺度，比較好養份?行去同佢傾，前後三次野，然後佢會好嬲咁同你開戰，打贏佢會加入，返去爺爺獸家後面管理肉田，每日都可以向巴魯獸領取到三塊巨大肉，另外可以以50 bit 同佢買到普通嘅「肉」

3) 古尼獸
係巴魯獸右邊版圖，嚟到古尼獸寢室。可以見到古尼獸係樹上食緊樹葉，心怕佢唔夠飽(笑)，就問下佢有無興趣食好西，然後只要畀一個食物道具(如：肉、數碼菇等) 引佢，二話不說佢就會跳落黎食，之後就會即時同你開戰(食完咗我嘢，仲要打…) 打贏佢會返去食咗開始之街右邊嘅樹，開通一個截徑，等你方便行過去數碼橋
(但係數碼橋唔知畀邊個整爛左，目前唔用得住)

4) 西拉獸Part1
喺古尼獸寢室右下邊嘅海邊版圖西拉灣，朝早至傍晚會見到有個黑影係海度。行過去時，會發現海底嘅黑影，係西拉獸。傾談間知道數碼橋爛咗過唔到熱帶森林果邊，而佢會帶你過熱帶森林(咁細條魚居然可以…)，送咗你去熱帶森林後，西拉獸會話有事，走先…唔…好似畀人誘騙咗去柬……打工。

5) 比達獸
到咗熱帶森林，係右邊森林區，你會見到比達獸係度發呆，同佢傾偈，佢會返去開始之街做老細，擺地攤，買肉終於唔駛一塊塊咁買。
(糧食問題開始解決，另外有錢記得返多少買回復磁碟)

6) 西拉獸Part2
西周行下執下地面上嘅各種道具，之後行返去西拉獸帶你登島果度，你會突然見到有座橋。行過去望下，原來數碼橋己經好返(睇黎係西拉獸整返好，佢真係有事，唔係騙案。) 之後係下午至傍晚時間行返去西拉灣，再同返西拉獸傾偈，佢會加入返去開始之街同比特獸齊齊夾份擺地攤。

7) 鑽地獸Part1
係開始之街左邊一直前進嘅區域，會見到有鑽地獸礦穴。步入會見到有隻三隻獸，右邊沿路入去會有地底湖。見到仲有鑽地獸好努力做緊嘢(Respact)，當然我係「被選中嘅細路」，主動出聲幫鑽緊山嘅鑽地獸，睇下有咩可以做。又真係有喎，可以做苦力：搬泥(小提示：記得帶「流動廁所」同「糧食」否則會有一連串育成失誤產生…)。就咁展開為期數天嘅苦力炒散。當中鑽地獸會話一日搬唔晒，大約需要三日先可以完成。
(P.S. 其實可以唔幫鑽地獸搬泥，但係除咗開始之街嘅訓練場，哩度係第一個野外訓練場，而且係Limited Edition，搬呢係一種體力向嘅訓練，相比開始之街更加有成效，可以練隻數碼暴龍之餘，又可以加快鑽山同遊戲進度)
(P.S. 2 喺每日做完苦力之後嘅時間，可以去訓練隻數碼暴龍，因為開始要打成熟期嘅數碼暴龍，需要訓練得比較強大，而且時間上睇，你隻數碼暴龍差不多由成長期，進化到成熟期，需要進化向嘅能力提升。)

8) 鑽地獸Part2
經過幾日嘅苦力同健身訓練，有返咁上下可以去返鑽地獸礦穴。見返果三隻野人獸，今次轉左，入去鑽地獸房間。見到鑽地獸，佢不斷話：好唔舒服好唔舒服好唔舒服好唔舒服…
唔舒服要搵我嚟解憂，二話不說就開片。經過哩段時間嘅訓練，成熟期嘅鑽地獸一樣無有怕。打贏佢之後，佢會話個洞穴好熱好唔舒服…好熱好唔舒服…

9) 火焰獸
打完鑽地獸，再行返去地底湖果邊，睇睇好努力果隻鑽地獸嘅進度如何。嚟到時，發現隧道己打通，但係仲有塊大石阻條路，要一隻成長期或以上嘅數碼暴龍先可以推得郁(山都可以鑽穿，區區一塊石…)，好啦！既然我隻數碼暴龍都成長咗，當然要大顯身手，一推就將塊石推落深坑…推完之後，繼續向前行，突然見到火焰獸，佢仲會引發一場大地震，睇嚟鑽地獸山洞咁熱同咁多問題，應該係火焰獸搞鬼。當然同咁火爆嘅數碼暴龍係講唔到道理，直接開戰，火焰獸喺初期嘅敵方嚟講實力相當強，記得要帶多少少回復用道具。打贏佢會之後會加入，返去開始之街開餐廳，可以喺數碼暴龍肚餓時，去食料理，可以飽肚之餘仲可以提升一定嘅能力值。

Check Point 1 – 熔岩洞
**打火焰獸記得去本身好多溶岩處執嘢，否則又係Limited Edition，過咗事件就會無咗。
另外，由火焰獸引發嘅大地震令迷惑森林原本有巨石塞住嘅通道打通左，可以經此去基亞草原，再向外探索。

未完，待續…