PS Digimon World 數碼暴龍世界 攻略 Part 4 隱影橋係乜眼睇唔到定唔存在？

Part 4

15號攞完果棵雨草，到底有咩咁特別？依家介紹返：

16) 鼻屎獸
首先係肉田旁邊嘅花埔同種子獸傾偈，佢話雨草係有特別用途。雨草就自然聯想到雨林果邊，用數碼橋去返森林果邊，就喺森林嘅嘢外廁所處，右邊版圖會見到有株「幼苗」。埋去調查下，會發現需要一啲道具去灌溉，就係咁，用之前講過嘅雨草，會變成一片雨雲，落起一人私家雨，淋完雨水，會發現幼苗原來係鼻屎獸，幫咗佢咁大個忙之後，當然會報答我哋加入，之後佢會返開始之街管理肉田，你每日都可以得到3塊 或 5塊極上肉。另外，亦可以同鼻屎獸買到加強訓練效果嘅兩款「食用蘿白」。


17) 猛鬼獸
喺森林嘅嘢外廁所上面版圖係「闇貴簇之館」。而喺館嘅前園會遇見猛鬼獸。佢會向你問及一啲奇幻嘅問題，想要嚇怕你，喺回答佢問題時選：
① 第一個答案
② 第一個答案
③ 第二個答案
咁佢會加入，返去開始之街，將會喺夜晚”遊街”嚇「人」。


Check Point 4 – 隠形橋
喺「闇貴簇之館」右邊嘅山谷邊沿版圖處，懸崖邊會見到一個位置另舍特別，每當行埋去，主角會覺得「好危險」「好危險」「好危險」！於是返去開始之街，睇下有無咩嘢關於哩個危險情報。
同爺爺獸門口隻浮球傾談之際，佢提到山谷處會有座隠橋，平時肉眼係睇唔到耐在，但又實實在在可以踩上去。聽到哩個消息後，再返去懸崖邊果度再嘗試，今次真係大膽咗，唔再講危險，踏前一步，又一步，發現果然有條隠形橋！之後就可以經哩條隠形橋去唔同嘅版圖。

18) 人馬獸
喺森林最右邊版圖，會有人馬獸守住「古代境時區域」嘅入口，而哩個守衞亦提出一個迷題，只要你破解到，就會畀你進入「古代境時區域」。題目係以該版圖嘅通道玩「畫鬼腳」。
一開始選定要行嘅開始點，一直行到人馬獸位置就得，點玩贏唔係重點，重點係每次玩，通道上都會出現唔同道具可以執(最好喺哩個遊戲執多啲道具，唔用賣嚟賺錢都好)，要贏唔難，難在點樣喺每次「失敗嘅」選擇上，揀一條可以執到最多道具嘅起點。經過一個「艱難」嘅選擇後，終於揀到正確嘅道路，喺終點遇見人馬獸，咁佢會欣賞你嘅「才智」唔再門口狗守衞，加入開始之街哩個大家庭，喺開始之街開設「醫院」，可以喺度醫病，同埋可以休息「虛度光陰」。


19) 巨龍獸Part1
過左個人馬獸守住嘅入口，終於進入「古代境時區域」，再向前邁進，就會進入「古代境時靜域」，哩個地方應該埋藏住唔少秘密，一步入，第一時間見到巨龍獸，作為守護者之一，佢會提醒你，哩度嘅數碼暴龍非常之強大，需要測試一下你嘅實你，挑戰你打返場。巨龍獸嘅實力不亞於暴龍獸，甚至有接近完全體嘅體質，要準備好多啲回復道具，打贏佢之後，佢向更深入嘅「古代境時流域」進發，尾隨至入口處，會見佢到仍然想守住哩個地方，佢嘅使命係作為一個守護者。而佢亦知你實力如何，所以大門為你打開。


20) 礦石獸
入到「古代境時流域」，其中一個版圖會見到一條好巨型嘅龍骨，喺龍骨底下行過，有一個位比較難發現嘅版圖入口。龍骨最左上方位置行入去，會見到一堆顏色比較光亮嘅石堆，充滿咗保護色咁黐晒地(人家乃石頭是也…)，行過去調查一下，現在堆石正是礦石獸，二話不說同佢開戰。雖然打贏佢，無「加入聲效」，但係會係鬥技場出現，都叫咗加入咗掛…

21) 巨龍獸Part2
出返去返到巨骨版圖，改為(前)上進發，一步入另一版圖，會見一隻黑巴多拉獸(燒焦左?)，咁火爆，當然都係一場對戰，打贏佢，係唔會加入開始之街，而係喺原位處守衞住，一種種嘅守衛，睇嚟哩度都真係有驚天大秘密。黑巴多拉獸對戰後，行返出「古代境時流域」入口，傳突出玩一隻巨大版嘅巨龍獸，原來佢正是巨龍獸師傅！而巨龍獸師傅同巨龍獸講佢會替佢守住「古代境時流域」，放心返去開始之街，加入哩個大家庭去幫忙解決數碼世界嘅問題，哩度嘅守衞之職，放心交畀佢。聽到巨龍獸師傅咁講，佢就無得唔聽啦，就咁佢就會加入開始之街，幫手管理餐廳。(點解唔係巨龍獸師傅加入呢？)


22) 角龍獸
通過之前嘅「隠形橋」，嚟到峽谷處公共廁所右邊，會見到「角龍獸商店」。幫佢賣嘢呃賺夠2500 Bit (另外又有人話要3280 Bit) ，佢會話你通過咗佢嘅考驗(原來係考驗)，答應加入開始之街，幫手管理商店


23) 奧加獸Part1
沿峽谷地區一路行，會路經一處有部電梯(數碼暴龍有需要搭電梯？)，而喺哩個版圖左邊有「施工處」，第一次行過去會無事，再調查下塊告事板，睇下有咩資訊時，豆腐渣嘅施工處就會崩塌，就咁跌咗落山谷下層(做咩要搭電梯？)起返身後(居然無事！？)再向下行，深山處真係有一個山寨，守住門口嘅居然只係一隻亞古獸，基本上，唔會輸，打贏佢，佢會走返入去山寨兼閂埋寨門！？


24) 巴多拉獸
既然山寨入唔到去，就行返去電梯處，搭電梯上頂層。頂層整層都係鳥巢(點解？部電梯畀人上嚟探雀嗎？咁咁高築巢又為乜呢？)。原來係哩個鳥巢係巴多拉獸嘅巢穴，見你唔識飛又上到嚟，一定係有咩鬼主意，作為不速之客，梗係打咗先講。巴多拉獸相當強大，一定要好小心打。打贏佢就會加入，識飛嘅佢，表示會畀你免費搭一程順風飛，帶你返去開始之街，佢會開設遊戲非常有用嘅「巴多拉運送公司」，比某豐更快，即時送到！


Check Point 5 –  山賊
觸發完奧加獸 Part1 事件後，爺爺獸門浮球獸遊嚟遊去，好似知道啲乜嘢咁，過去同佢傾下，佢會話峽谷處原來有山賊，原來山寨係出山賊唔係某國咁出產品。咁先可以玩到奧加獸事件嘅後續。

25)獨角馬獸
不時到人馬獸醫院同醫傾下點樣可以健康一啲，點知從人馬獸醫生口中得知係「迷惑森林」至「草原通道」處有受傷嘅數碼暴龍。當然要代醫生去睇個究竟，帶同喺醫生處買到嘅藥物，去到事發地點，喺果度會見到獨角馬獸，原來受傷嘅數碼暴龍就係佢。需要一啲醫治，可以畀一開始就會有「膠布」或者買返嚟嘅「藥」過佢，就會醫好佢，咁佢當然會為咗報答我哋，加入我哋啦！佢會加入開始之街，幫管理商店。


26) 鑽地獸Part3
返去鑽地獸之前仲係度鑽緊既地方，發現佢已經鑽通左隧道(終於…同時間無關，只係事件觸發)，另外同佢傾下，佢會加入開始之街，開設寶物發掘店

27) 怪蛙皇 / 怪蛙獸
係「大便山」上面版圖係「基岡濕地」，一入去，再上Ｄ會見到蝌蚪獸。成長期嘅佢，居然夠膽搵我嚟對戰，果然係「地頭蟲」。打贏佢會畀幾隻怪蛙獸「協持」返去「怪蛙獸之鄉」。喺度會僅見怪蛙皇，之後，你就可以用一種名為「功積」嘅點數同佢換取道具(功積係用Digimon Card 同怪蛙皇換積分)。
***記得要換支「高級魚杆」
臨走前，再去返門口，同怪蛙獸傾下偈，佢會加入開始之街嘅鬥技場作為選手對戰。


28) 加布獸
係「霧森林」入面邊處，會見到加布獸企係度，應該係迷失咗，過去當然又係一場硬仗，帶你離開哩個森林啫，唔駛測試我實力掛。只係，佢只係成長期，根本就係大蝦細，打贏佢會加入開始之街，喺寶物發掘店做鑽地獸助手。


29) 祖利獸
係「霧森林」行左一陣你會覺自己係度兜圈，十足十結界一樣。只要一直向上行，就會見到祖利獸。作為哩個數碼島嘅元祖級存在，同佢傾偈可知道唔少數碼島異變原因。及後佢會令濃霧退散，結界解除。
***祖利獸亦都係野外訓練場之一

30) 加魯魯獸
繼續向右行，喺去到同雪原交界處，會見到加魯魯獸，野狼就係危險，見到跑唔切就要硬打，打贏佢一次後，佢會提議再約「明日16:00」再戰。但係如果你咁善忘，又無及時應約，隔多一日先出現記得去應約的話，佢會等你等到受咗傷(！)，得返一半HP & MP 同你再戰。
(***記住第二戰係無得俾你控制，要全自動由你隻Digimon 同加魯魯獸自動對戰，記得！記得！記得！先回復返隻 Digimon 嘅 HP & MP)
打贏加魯魯獸後，佢會加入返開始街，幫手管理餐廳


31) 雪人獸
喺加魯魯獸出現嘅右邊版圖，步入「雪原」時會見到間「雪屋」。如果你哩刻正正帶住隻幼年時期嘅Digimon 嚟到哩間「雪屋」前，咁啱又咁橋，哩隻幼年時期嘅Digimon 又「病」咗喎，哩個時候，你會突然入咗「雪屋」入面，原來哩間「雪屋」係「雪人獸雪屋」。佢會勁鬧你無良心點養隻Digimon，幼年時期都可以病咗，跟住會幫你醫返好隻Digimon，但係佢唔會即時返開始之街，可能你嘅表現太差，下次帶一隻唔怕凍嘅Digimon 再嚟返「雪人獸雪屋」，佢質嘗你有進步，值得信賴，會加入返開始之街幫手管理餐廳。
(***幼年時期嘅Digimon 成長時間好短，可以維持時間唔多，雪人獸哩Part，基本上都係上一隻Digimon 一死，變返蛋，就要帶果隻Digimon 用巴多拉飛去附近，要自然病亦係一件難事，所以帶過嚟前先食一「腐壞肉」就可以好容易達成「入屋」條件)

32) 企鵝獸
喺「雪人獸雪屋」右邊「雪原」海邊版圖，會見到企鵝獸企係間「巨大雪屋」門口。上前問道，先知佢係推冰遊戲嘅台主，當然係要挑戰佢，會同佢玩「推冰壼 Mini Game」。遊戲就係「冬季奧運會」會見到嘅冰壼遊戲，今次只可以用自己人類嘅技巧嚟戰勝，Digimon 企埋一邊先。一輪惡戰後，贏咗佢，就會加入開始之街，喺鬥技場入面開設推冰壼 Mini Game
(***如果第一次贏唔到佢，再挑戰佢，代價需要俾一條「魚」佢先可以，首次試玩免費，記得帶多啲魚先好去挑戰啦！)


33) 毛人獸
喺「雪原」海邊版圖會見到一啲只得圍牆嘅雪屋仔，三間「屋？」分別坐咗三隻毛人獸，每位毛人獸都需三種道具，而同佢以物易物，會得到相應嘅道具，交換數量同次數不限。以現時進度，所需要嘅道具應該有齊晒。只要佢哋需要嘅9樣道具都交換齊之後，最後換齊果位毛人獸會加入開始之街，開設新嘅「地下商店」。
***P.S. 緊記！緊記！緊記！由於係第三位毛人獸返去開始之街，意味第三位毛人獸所交換嘅項目會消失，所以有長期需要嘅交換道具，可以留果位毛人獸喺度，如果需要賺錢的話，有得用「中回復磁碟」換「防禦Plug-in」果位毛人獸必定要留低，因為兩種道具買入同賣出差價係「1,500 Bits」，只要有恆心，上樓不是夢。

34) 奧加獸Part2
經「雪原」會再行至「峽谷地區」，再次行經峽道時，上次喺山寨門口，被你打敗嘅亞古獸會返黎復仇
今次仲要拉大隊，帶埋大佬奧加獸同另一隻亞古獸，實行「獸多蝦獸少」。今時今日嘅你，實力已經無需要擔心，打贏佢地之後奧加獸會即時走佬，由暗道返入山寨。去返之前山寨大門口，再無任何守衛看守，可以直入長驅直入。入到大廳再再次見到奧加獸，今次會連同兩隻加布獸一同繼續「獸多蝦獸少」。打完奧加獸又試走佬，果真懶皮，咁當然去追個懶皮啦！


35) 貝殼獸Part1
喺追擊奧加獸中途，一路上會行過「峽谷」當中有一個版圖會有「草」嘅平台，喺果度會聽到有奇怪叫聲。由於奧加獸哩個懶皮嘅山賊先係目前重點，暫時唔理住，搞掂隻懶皮先。

36) 巨鯨獸Part1
穿過「峽谷」追到去「雪原」海邊，喺一個貌似碼頭位置，見到巨鯨獸喺度，上前問佢有無見到山寨，佢話佢個竇俾人霸佔咗，希望你可以幫幫佢，咁既然開到聲，梗係過去幫佢啦！


37) 奧加獸Part3
坐上巨鯨獸嘅背脊，不消一會，去到巨鯨獸個竇「海岸洞」。唔望由自可，一望，原來霸佔者係個懶皮奧加獸(點解佢可以咁快手？又過咗去「海岸洞」又趕走埋巨鯨獸，明明緊貼住佢)，而且今次仲有惡海龍獸(今次除左要繼續以一敵三外,仲要應付完全體，記得多帶回復磁碟)
經過一輪苦戰，終於再次戰勝，打贏晒佢哋後，奧加獸假意加入，趁主角們鬆懈時，乘機走佬，繼續懶皮。


38) 巨鯨獸Part2
因為你幫左巨鯨獸，哩個大恩，佢為左答謝你願意加入開始之街，開設「運輸船」服務。(其實佢唔知邊個令奧加獸走咗入哩度…) 之後會帶你返開始之街。


Check Point 6 –  怪聲
返到開始之街，由於長久未有返嚟，開始之街變化甚大，亦係時候收收風，睇下有咩新嘅訊息，再次同浮球獸吹水時，佢話「峽谷」處有怪聲，唔知係由咩引致，希望可以去調查下。回想一下，追擊奧加獸時，經過「峽谷」有「草」嘅平台，的確聽到怪聲，整理下道具，之後再出發，稍後再到「峽谷」一探究竟。