PS Digimon World 數碼暴龍世界 攻略 Part 5 暴風雨嘅前夕終於要蒞臨！

Part 5

39) 奧加獸Part4
目標明確，一追再追，唔可以畀奧加獸哩隻懶皮走甩，思考一下仲有咩地方可以成為另一山寨。周圍走走逛逛，行到去鑽地獸礦洞口，發現「鑽地獸礦洞」變左「奧加礦洞」。唔駛講啦，肯肯定又係隻懶皮，入到大廳位，又再見到陳生，再再再一次開戰，佢今次只係得返兩隻亞古獸傍住，相對上次惡海龍獸，易打太多了。打贏佢之後，終於唔再懶皮，肯加入開始之街做「食蕉」(護衛)。

40) 海龍獸
仲記記得之前同怪蛙皇換左支「高級魚杆」嗎？帶同新嘅「高級魚杆」去到「沙灘」果個「龍眼湖」，先釣一定量嘅魚仔，準備成為另一種「魚」嘅餌。釣魚時留意左上角數碼時鐘，喺藍色同紫色交界時(即鐘面4或8時)，向下面版圖進入「真龍眼湖」，哩個版圖視點相對較為水平。哩個時間進入，你會見到有個大黑影喺湖中循住固定嘅路經游走。用魚仔做餌，放係佢游嘅路線上，會見到佢上釣，而且唔同普通魚，有好大力氣同需要一定技巧先可以同佢搏鬥。幾經辛苦，終於成功釣上，釣上嚟，先發現佢唔係普通嘅魚，而係海龍獸，海龍獸上水後會問你想唔想成為佢朋友，當然唔會拒絕，選擇「佢做朋友(友達)」。作為友情嘅證明，佢會俾支「龍眼湖之笛」你(把炮，海龍都要聽你支笛)，你可以隨時喺「真龍眼湖」吹笛，呼喚佢黎帶你過湖嘅對面，然後佢會直接帶你過去「真龍眼湖」嘅對面岸。

Check Point 7 –  海龍獸
海龍獸唔會加入開始之街，會繼續留喺「真龍眼湖」，更可以向佢學3招水系招式。方法同第一次釣佢上水一樣，只要再喺果個時間，即係喺藍色同紫色交界時(鐘面4或8時)再釣佢上黎就得，每次可以學習一招，而選擇第三個選項係拎變海龍獸嘅進化道具

41) 古加獸 & 比多獸
「真龍眼湖」對面，正正係神秘嘅「比多森林」，行入「比多森林」內部，會見到有兩個「野外訓練場」。入去仲會見到古加獸同比多獸，分別同他地傾偈，佢哋雙雙會加入開始之街嘅訓練場，改造訓練場成加強版「訓練場EX」，而訓練場自此訓練成果加強
***哩度亦可以參加「昆蟲系」擂台比賽 ，限定比蟲系Digimon 參加，但唔可以係究極比多獸，而獎品就係究極比多獸嘅進化道具。


42) 鼻涕獸Part1
巨鯨獸加入後，可以乘搭巨鯨獸去新嘅地區「工業之城」，到達後，會喺碼頭位置登陸，前行一小段路，你會見到有個坑渠，強制性小心地滑就會跌入去個坑渠入面。落到去會見到成個「下水道」都污煙瘴氣，睇嚟都係工業排污問題所致，忽然見到鼻涕獸，見到哩種污物系嘅Digimon，唔通同佢有關？上前問道，鼻涕獸話：「關我鬼事～」。


43) 安杜路獸Part1
行入返「工業之城」，沿住路上返去入面中心地帶，入果間「電腦房」。入面見到安杜路獸企咗喺電腦一臉苦惱，上前同安杜路獸了解「工業之城」嘅現況。而佢表示：「工業之城」正受到不明嘅破壞，而佢要守住哩個控制室，行唔開，希望主角你可以幫手查明原因。正義嘅安杜路獸叫到，當然無托手掙。行返出門口，直向右行。見到兩隻守衛獸，同佢傾下了解情況，佢哋表示：需要「通行證」先可以通過。「通行證」喎，當然去問安杜路獸拎啦！點知安杜路獸話：唔駛「通行證」㗎喎！(睇嚟真係有問題＜廢話)但消息指守衛獸會喺每日正午12點同零晨12點交更，即係表示哩個就係「漏洞」，就喺果兩個時間去返哩個有兩隻守衛獸嘅版圖，會發現「漏洞」出現，交更放工，無咗守衛獸，就可以暢通無阻通過喇！


44) 炮彈獸Part1
沿路入到中心地帶會見到炮彈獸喺度大肆破壞，咁當然第一時間上前阻止佢。炮彈獸攻擊力幾高，小心回血，如果唔係好易突然死亡。一輪苦戰後，打贏佢，炮彈獸會瞓咗響地下，完全無晒反應。


45) 安杜路獸Part2
處理完核心問題，就返去同安杜路獸匯報返，原來係炮彈獸喺度搞鬼。雖然處理咗核心問題，但仍有一部份問題仲未清理，安杜路獸表示，「下水道」問題未解決，希望我哋可以再繼續幫忙。咁當然落返去「下水道」喇！

46) 鼻涕獸Part2
又試再落返去「下水道」，發現無晒啲污煙瘴氣，行返過去鼻涕獸果度，居然話你搞到佢，二話不說就同你打起上嚟。當然Digimon World 最”強“敵人挑戰你，你梗要走唔甩啦！結果完全唔需要想像。打贏佢之後，加入開始之街，開地下商店。


47) 安杜路獸Part3
處理埋「下水道」問題，當然再返去同安杜路獸報喜，而佢表示多後你嘅協助，「工業之城」正門已經重開，可以經大門口作出入，當然行去大門處作最後確認，果然係大門已開，主要嘅各大「城鎮」已重新接通。再返去再同安杜路獸確認返大門已開，整個「工業之城」恢復正常，佢表示：既然問題全部解決，亦為咗答謝你，佢會加入開始之街，係巴多拉獸運輸屋門口罰企(完全唔知有咩用)。


48) 炮彈獸Part2
既然「工業之城」恢復正常，入返中心地帶，會見到炮彈獸亦一同恢復正常。上前𨘋請，會加入開始之街，喺餐廳度開音樂機，可以選擇播放指定背景音樂。
(唔記得佢同安杜路獸邊個返街先，總之唔係炮彈獸先就係安杜路獸先)

49) 忍者豆豆獸
當商店出現左地下店時，喺開始之街嘅右邊出口去「數碼橋」，然後向下行向古尼獸寢室時，會突然有情節發生，出現一位挑戰者：忍者豆豆獸突襲。能力唔算太強，以現時完全體級嘅戰力，輕鬆取勝。說服後會加入開始之街，企係地下商店度。
(***緊記！緊記！緊記！挑戰忍者豆豆獸前，一定要先save再去挑戰，有一定機會率會出現卡住喺忍者豆豆獸出現嘅情節 ，一直會等挑戰者出現，一直等，一直等….忍者豆豆獸應該學咗隱身術，完全無現身，只可以重啟遊戲先解到哩個情況，無save 到就要重玩前嘅內容。)


50) 巨雞獸
喺清晨時份(即係深藍同淺藍之間果點)，去到祖利獸下右嘅版圖，版面最上位置會見到巨雞獸，當然又係一場硬仗，作為成熟期嘅巨雞獸，絕對無難道可言，打贏佢之後，會加入開始之街，每逢清晨時份企係Item Bank 門口，提醒你數碼世界已經過咗一日，換日雞是也！


51) 貝殼獸 Part2
之前喺開始之街嘅浮遊獸口中得知，峽谷處有怪聲，需要去調查一下。然而必定要經指定路線先會引到貝殼獸落地面。由見到貝殼獸果處再經奧加獸山寨行至峽谷，然後再經雪原行返去貝殼獸處會，你會見到原本喺岩石上嘅貝殼獸，會落咗地面，同上前了解，會加入開始之街開設報告板，提供數碼世界最新資訊。


52) 宇宙腦魔
如果有印象的話，喺獨角馬獸右邊版圖，喺地面有d 古怪圖騰，喺貝殼獸加入後，喺報告板得知，原來圖騰係外星人所為，既然收到風，當然要再去果度調查。去到果個版圖，見到地面嘅圖騰多咗好多，跟手宇宙腦魔就出現了，睇嚟收到風嘅唔止我哋。作為第二代嘅最強完全體，果然係唔同啲，記得準備好晒啲各種回復磁碟，否則應該會感受到外星之力有幾強大，一輪苦戰後，宇宙外力，都不敵「被選中嘅細路」之力，及後佢會加入開始之街，幫手管理餐廳，有宇宙大餐食了。


Check Point 8 – 開始之街發展度50
一路召回大量野外嘅Digimon加入開始之街，開始之街嘅發展度會一路上升，每次有新嘅Digimon 加入，再向爺爺獸交談，就會得知現時發展度，超過50的話，會開始觸發最後劇情。

53) 飛龍獸Part1
當加入開始之街嘅Digimon 有返咁上下，就去問下爺爺獸，開始之街發展成點。經過爺爺獸一輪訴說後，得知發展度去到50(或以上時)，作為被選中嘅細路，已經感受到有點點異樣，如暴風雨蒞臨前嘅狀況。果然，一出爺爺獸屋企門口會被飛龍獸偷襲，一場硬仗一觸即發 。由於一開始已畀飛龍獸偷襲，損失HP 1500， 幸好唔係自動戰鬥，可以回復，記得打果陣用回復磁碟補返。雖然係成熟期嘅Digimon，但飛龍獸有不亞於完全體嘅能力，需要一啲耐性先可以打得贏，打贏飛龍獸後，只見佢倒地不起，奄奄一息咁，所以即時送返入爺爺獸之家，暫時喺爺爺獸屋企療傷。


Check Point 9 – 無限山
同飛龍獸一戰之後，爺爺獸告知我哋，真正嘅考驗依家要開始啦！果然係暴風雨終於蒞臨，而哩個最後戰場嘅入口，居然就係開始之街。喺開始之街，巨鯨獸同巴多拉獸運輸公司(果度唔通係海關？)嘅右邊，原先有瀑布嘅湖邊，變成咗一個通道，係進入無限山嘅大門。由於無限山係故事最後迷宮點，有一定量電腦補給品可以取得，但始終有限，記得帶得足補品，先好入去啦！