PS Digimon World 數碼暴龍世界 攻略 Part 6 終於進入無限山，最後嘅邪惡…大部份都係機械乜乜…
Part 6
54) 惡魔獸
當大家準備齊全後，向無限山進發。
無限山其實係一座高塔式迷宮地圖，每層都有傳送點去另一層，主要都係向前行同埋挑戰山內完全體實力級數嘅Digimon。一路進發，第一隻遇到嘅會係惡魔獸，戰鬥力完全係完全體級，所以千祈唔好以為佢係成熟期就掉以輕心。打贏佢，會清醒返(！？)加入開始之街，喺地下商店賣毒品：惡魔晶片。
55) 機械飛龍獸
其實大家細心啲留意，其實哩隻機械飛龍獸係可以避開戰鬥，掂行掂過，如果想學佢嘅招式，大可以留返裏關時再挑戰。當然現在我哋唔會咁輕易放棄召回每隻Digimon 嘅機會，上前一戰。苦戰，之前成熟期嘅惡魔獸都咁勁，完全體級嘅機械飛龍獸當然更加強大，保持血量過半，打贏佢亦係時間嘅問題，打贏就當然清醒返，加入開始之街，企係鬥技場嘅左邊，自稱《最強》。
56) 機械暴龍獸
一路直入深處，喺迷宮路口處會見到機械暴龍獸。作為一隻「攔路虎」，佢要嘅唔係過數錢，而係消滅外來者，唔似機械飛龍獸，可以遲啲先處理，機械暴龍獸哩場硬仗點都走唔甩，點都好，拯救檔案島嘅路上，遇神殺神，遇佛刺佛，何況係一隻區區嘅機械暴龍獸…話口未完，就知錯了，機械暴龍獸係遊入面第二強大，唔小心睇住血量，好易被秒殺，亦係因為咁，應該更加令你明白到，越嚟越接近真相。最終當然會戰勝，清醒後嘅機械暴龍獸會加入開始之後，企嘅鬥技場幫你𥄫實啲戰積。
57) 機械邪龍獸
***打完遊戲中第二強，當然係挑戰最強。最終Boss要來了。如果無返咁上下實力，即係如果剛才嘅機械暴龍獸都令你感到非常吃力，又用盡回復磁碟等等。都建議要返落去開之街，訓練下同埋買返多少補給品，否則，都係要走多轉(死咗喺爺爺獸之家再行返上去)。
入進迷宮最深處，終於真相大白，原來有位博士咁嘅物體入咗嚟檔案島搞搞震，當然反派老土劇情，講一堆個人理由、理想化嘅言論，所以幫哩度嘅Digimon 洗晒腦，幫佢做嘢。到哩一刻大家終於知道原來檔案島一切一切嘅異樣都係因為佢，咁作為反派，有近身護衛當然好合理，但今次派出嘅唔係一般見到嘅Digimon 咁簡單，全身樣樣睇落都好熟口面，但就完全未見過，全身上下滿滿機械金屬感，嚟不及細思，機械邪龍獸就受命上前驅散。機械邪龍獸不愧為全部最強機械族嘅結晶所在，頭頂來自機械飛龍獸上顎，而下顎同身驅來自機械巨龍獸(哩隻GAME無收錄)，左臂有機械暴龍獸左爪，右臂則來自機械飛龍獸嘅飛彈，膝頭仍來自安杜路獸頭蓋，背包上更有兩枚鋼鐵豆豆獸嘅精神衝擊炮，簡直係集各機械乜乜完全體之大成。絕對要帶大復活磁碟同超回復磁碟，否則你都係要走多轉(死咗喺爺爺獸之家再行返上去)。
經過一輪激戰，最終都打贏機械邪龍獸，然後諗住捉個博士出黎打一身，點知佢學咗奧加獸玩懶皮，臨走佬前，仲要引發大爆炸，諗住炸死大家。
58) 飛龍獸 Part2
就喺將會爆炸之際，飛龍獸突然出現，已經休養好嘅佢，即刻使出「空間轉移術」拯救出主角逃離爆炸現場。一齊返回開始之街後，飛龍獸告知之前就係佢調查出異樣係喺無限山度產生，見到都係由「人類」搞事，所以先會錯誤攻擊「你：被選中嘅細路」，現今你已經拯救咗檔案島，非常樂意加入開始之街，之後飛獸就會係鬥技場幫你占卜(非常有用嘅功能嚟)。
你：被選中嘅細路，拯救咗 Digimon World 檔案島嘅危機，你亦都成為Digimon World 嘅真。英雄。
恭喜！你都完成左表關。
Check Point 10 – 裏關
大家應該發覺仲有好多野未做，各處仲有各種場所未有進入，迷團亦未完全解開，而真正養育事項，鬥技場等，依家先正式開始，所以睇完動畫之後load 返個save，可以繼續玩裏關
59) 蛋蛋獸
唯一只可以係裏關先會出現嘅Digimon，既然無限山咁近，當然係裏關遊嘅第一首選，入返無限山最深處，見到博士同機械邪龍獸位置，會見到隻蛋蛋獸企係度，真係迷的一樣，當然，同隻蛋講道理係唔會明，打過就可以了解返。衝過去同佢打，打完機械邪龍獸，要再返第四代最強完全體唔會有問題，只係「最強」都唔係吹出嚟，打贏佢會加入開始之街，幫手管理餐廳，有蛋食了…
60) 悟空獸
嚟到古尼獸寢室下面大樹處，見到一棵有大門嘅大樹，之前都試過敲門，只係無乜反應，當開始之街嘅發展度過50 時，情況會有啲唔同，悟空獸會從樹上跳落黎突襲，作為第三代最強Digimon，當然要準備萬全先好去挑戰，苦戰一輪，終於打敗悟空獸，加入開始之街後，會喺數碼橋度賣進化道具「黃金香蕉」
61) 獅子獸 Part2
同樣係發展度過50 時，喺貝殻獸報告板收到風，得知鑽地獸洞穴有重大新發現。二話不說就衝去鑽地獸洞穴，最下面第三隻鑽地獸發現古墓，原來係獅子獸祖先嘅墓穴(黃金劍獅獸)。入面有石墓，調查會得到「獅子獸祖先石板」，拎住塊石板去返平原處獅子獸，將佢祖先嘅「遺物」交返畀佢，佢會參詳到祖先嘅說話(希望唔係見到「窮」字)，就係咁，獅子獸會覺醒，加入開始之街，然係就會出現喺巴多拉獸運輸屋度企，正義朋友都係齋企嗎？
Check Point 11 – 串燒豆丁三兄弟
哩三兄弟好高竇，出現機率係3/200，如果當初喺主線故事內行經佢哋出現嘅版圖，有見過佢哋，但當初唔夠佢打，或者行過咗都好，都可以去返該版圖搵佢哋，如果去到唔見佢哋，可以過版圖嘅方式，出出入入該版圖，直致佢哋現身。現身時刻版圖原有嘅全部野生Digimon 會全數消失，得返佢一隻，可以用哩個方法去確定一下。作為完全體嘅佢哋，如果無返咁上下實力，都真係練返好先去挑戰佢哋，事關出現係機會率，唔夠打要重新過版圖…
62) 妖精獸
喺開始之街經數碼橋到達嘅果個海灘，妖精獸將會有機喺度出現，最好帶同自然系Digimon ，能學習到自然系嘅”「晶片蟲」技能，打贏之後，妖精獸會加入開之街，管理商店，而同佢可以買到極有用嘅「訓練記錄卡」，加強每次訓練後數值提升嘅效果。
*請緊記，同妖精獸買完”訓練記錄卡”後，哩一世都唔好再同佢講野，否則扣繁榮度時就愛莫能助
63) 豆豆獸
喺出現宇宙腦魔版圖，再向上行一個版圖，會有機會見到豆豆獸，打贏豆豆獸，佢會加入開始之街，幫手管理地下商店。
64) 鋼鐵豆豆獸
由巨鯨獸送去「工業之城」碼頭，一入再前進，入大門口版圖，喺右下角處會有機會見到鋼鐵豆豆獸(出現位置比較入，需要再行前以作確定)，因為地形嘅原故，三粒豆當中，算鋼鐵豆豆獸最難打，不過亦唔算係難事，打贏佢之後會加入開始之街，喺開始之後位置搵唔到佢嘅蹤影，因為佢只出現喺鬥技場比賽中。
Check Point12 – 冰封聖殿
乘搭巴多拉獸運輸公司，前往雪原，着陸後一直向左行可以見到：冰封聖域。冰封聖域只可以允許疫苗系Digimon進入，所以，如果前期故事主線時已養育到疫苗系嘅Digimon，亦可以提前進入，由遲並非主線流程必定需要嘅劇情，所以可以留往裏關時再闖。
65) 天使獸
一入去冰封聖域喺聖殿大堂調查下四周，發現除左個冰像之外就乜都無，唔係又要返開始之街收風先知發生咩事掛…正想離開之際冰像突然有所郁動，移開後出現一條地下秘道(如果用自動領航員飛返開始之街就真係…)。一入去行前小小位置，轉右會有通道可以進入深處。通過傳送點黎到最深處，會見到雪加獸同兩隻亞古獸，見到哩個情況，相信都係一戰，結果可以直接預知，三兩下手勢，打贏佢哋之後，行到光點時，突然產生一道強光，而光亦係令人溫暖。強光過後，回個神來，發現現在身處聖殿大堂，睇嚟強光亦將我地傳送返出嚟。哩刻發現聖殿大堂冰像消失咗，從天而降天使獸(居然畀幾隻成長期困住…睇嚟天使獸係真善良)，當言謝之後，會加入開始之街企，陪住爺爺獸，幫你提供情報。
Check Point 13 – 聖殿訓練場
冰封聖域直行入去會有個聖域訓練場，訓練效果比起開始之街訓練場好好多(全部野外訓練場訓練後提升效果都比升級版開始之街訓練場更好，只係比較專注某啲項目，同無餐廳配合，各有千秋)
Check Point 14 – 闇貴族之館
先前有疫苗系先入得嘅冰封聖域，跟住有病毒系先入得嘅闇貴族之館。
之前，去過一間鬼屋大宅，就係遇見猛鬼獸果間，如果拍檔係疫苗系或者數據系，嘗試進入，會聽到屋內話：「你唔夠強大，過主啦！」但如果拍檔係病毒系Digimon，就可以推門直入(鼻涕獸都得…強)。
入到見到一間好巨大嘅大宅，嘗試去各房間調查，發現全部門都上鎖，只得右上角果度門無鎖，可以探索。循唯一開啟到嘅門，入到房內，一直向左行，行到飯廳處，飯廳內亦無乜發現，突然見壁爐處見到有反光物，上前調查發現反光物係一條闇貴族之館嘅館之鍵，取得後可以一開啟屋內全部門(除右下角果度被封印嘅門)
66) 吸血魔獸Part1
得到館之鍵，出返大廳，就先去開啟右上角嘅門。一路上向前調查，直到入到其中一間有張床嘅房調，看似係睡房，調查下張床，會發現原來張床有機關，哩張床嘅作用唔係要嚟瞓，係一部升降機。見到咁，無理由唔搭部升降機落去睇下，落到去地窖，會見到吸血魔獸，而佢睇嚟唔係太正常，吸血魔獸表示：「我好辛苦，好辛苦，好辛苦…好肚餓…好耐無吸過血…幫下我…」
嘩！好在你無力啫，你話無吸過血叫我幫手，我真係轉身就…然後就聽吸血魔獸用最後嘅氣力叫到：「雪櫃」！就掉低條雪櫃匙喺地下，就無用力咁倒下。
不過作為被選中嘅細路，點會咁就走咗去咗。見佢咁辛苦就幫下佢啦！攞起雪櫃匙之後，去返起初無鎖到果度門，見到有廁所果間房，向左邊會見到三隻帽子猛鬼獸，果間就係廚門，見到藍色門嘅入牆式雪櫃，用條匙一開，點知唔見有野(唔通佢真係想吸我啲血？)。搵唔到血畀吸血魔獸，返去搵佢容乜易畀佢吸左我啲血當保命㗎…都係走為上著啦！一行出闇貴族之館大門口，出現一件未見過嘅肉，因為好新鮮，新鮮到仲流緊血，心諗…唔通吸血魔獸要嘅就係哩件「血肉」。究竟點解會咁靈異，飛咗出嚟？都無乜時間思考，即刻馬上立即飛奔去畀吸血魔獸，食咗你帶畀佢嘅「血肉」之後，吸血魔獸即時醒返晒，為咗答謝你，會請同拍檔去飯廳度共聚晚餐，吸血魔獸亦會同你喺餐枱上講解返一啲檔案島嘅歷史，得知吸血魔獸，自然唔會加入開始之後，但你希望佢可以參加鬥技場，可以一齊比賽，幫咗咁大個忙，少少要求，吸血魔獸當然答應啦！
67) 吸血魔獸Part2
本以為，吸血魔獸係高貴嘅一位伯爵，唔會就咁加入我哋大家庭，處理完佢單嘢就完事。一返去，望望貝殼獸報告板睇下有咩新資訊，驚見吸血魔獸宣布退出鬥技場。What?加入即退出，咩玩法，而且以吸血魔獸嘅地位，無可能會咁做，事情絕不簡單。正因為咁，打算再返闇貴族之館，查個究竟。入到飯廳，餐枱處見唔到吸血魔獸，再去返第一次見到佢嘅地下室，鬼影都無。睇嚟吸血魔獸不在大宅中，無法唯有走人。正當要離開闇貴族之館，喺大門口就見到惡魔獸飛出黎，並告知，右下角嘅被封印門已經解封(惡魔獸有份搞鬼？)二話不說，入去一探究竟。封印嘅原因，哩個房間原來係一個監倉。喺入面會見到吸血魔獸果咗喺個監倉入面，而且佢已經唔多清醒啦……
68) 喪屍暴龍獸+吸血魔獸Part3
繼續向房間內部邁進，會發現一個彷彿實驗室嘅地方，出現咗隻喪屍暴龍獸。真相大白，原來吸血魔獸喺度秘密研究緊生物科技與碳基生物重生嘅實驗。點知實驗失敗收場，依家出現咗隻喪屍暴龍獸，完全失控。點都好啦！依家都要打返場，控制隻野喪屍暴龍獸，先可以救到吸血魔獸。果然係連吸血魔獸都打唔贏嘅實力，係非一般，但我始終係被選中嘅細路，回復磁碟戰術，終於制止咗喪屍暴龍獸嘅失控，行返去監倉同吸血魔獸交代返，喪屍暴龍獸已受控，佢又忽然間好似無事咁喎……就咁，齊齊返出去飯廳餐枱處 。一輪偉大嘅祟高理想演說之後，吸血魔獸帶領研究成果嘅喪屍暴龍獸，雙雙加再次入鬥技場。
Check Point 15 – 玩具街
解哩個任務比較麻煩，確實係個人認為，整個遊戲最麻煩嘅一個章節。首先要進化成鼻涕獸(即係話最少都要變返蛋一次)，而玩具街嘅入街嘅資格係你嘅同Digimon要係熊仔獸。
建議進化方法：揀第一隻蛋，進化成亞古獸，然後完全唔訓練佢，記住HP & MP 少於 1000以及全能力唔可以高過100，跟手走去醫院搵人馬獸休息過時間(又或者未解角龍獸任務嘅話，依家解果種浪費時間嘅任務就最好啦)。
69) 熊仔獸Part1
搭巴多拉運輸公司去迷惑森林祖利獸度，早前探索哩度周邊環境時，應該有經過玩具街門口，先前嘅情況會發現，搵唔到任何機關可以開啟玩具城嘅入口，而如果你身邊嘅Digimon 正好係鼻涕獸，進入左邊巨龍獸-EX 屋仔入面，調查一下張沙發度果件熊仔獸嘅衫，令人震驚嘅一幕出現，你果隻鼻涕獸會着上件熊仔獸嘅衫進化成為熊仔獸(其它Digimon 只會令件衫跌落地下，無事發先)，哩個亦係全遊戲唯一一個條件觸發嘅進化事件。成為咗熊仔獸，咁你就可以自由進出玩具城，入去入面解救玩具街出現嘅問題啦！
70) 邪熊獸
入去之後，發現哩度同外面嘅世界截然不同，充滿玩具嘅一個環境，連地板都係由LEGO組城。一路殺上到去玩具城最頂層會見到隻邪熊獸。原來係佢拎走左玩具街嘅一部份部件，就係佢咁做 ，令到玩具街出玩不同嘅混亂。哩場硬仗唔打唔得，最強級數嘅完全體嘅二段形態，回復磁碟戰術少不免，一輪惡戰後，敗將嘅邪熊獸只係一時貪玩，會畀返佢攞走咗嘅部件你，以佢嘅實力，當然會加入開始之街嘅鬥技場啦！
71) 熊仔獸Part2
就咁，拎住喺邪熊獸攞返嘅部件，行去玩具街右上角機械人果間屋，交還玩具街重要嘅部件畀佢，佢會令玩具街回覆正常，哩個時候，熊仔獸會加入開始之後，而熊仔獸(衫)將會掛喺爺爺獸屋內。（唔知爺爺獸有無洗乾淨呢……)
72) 亞伯獸
由於係半開放世界遊戲嘅關系，部份位置，大家可能會不斷重遊，除咗之前提過嘅尊貴串燒豆丁三兄弟外，有時仲會遇到潮人亞伯獸。佢會喺5個唔同地方出現陸續現身，只要搵到亞伯獸藏身之處，將可以得到兩次重點獎勵。
果5個地方分別係:
①古代境時急域礦石獸處
②奧加獸山寨大廳
③發現獅子獸先祖石版處
④工業之城下水道鼻涕獸處
⑤玩具城頂層·邪熊獸處
而五處位置都分別都需要先完成主線故事，亞伯獸先可以匿埋喺果度。
同佢玩五次僕匿匿後，佢就會加入開始之街，企喺Item Bank 亞古獸旁邊。
(企喺果度唔知係咪想偷野…)
Check Point 16 – 數碼暴龍機
搵到亞伯獸嘅其中兩次，會喺佢身上跌出數碼暴龍機(磚機)。每取得一部機數碼暴龍機會令道具欄多10個item 空格，即係可以帶喺上身嘅道具項目多10個。
***有一樣需要注要，如果一開始有用△三角形秘技，身上一開始已有30個道欄位，如果取得第一個數碼暴龍機時，反而會令道具欄由30跌回正常嘅20，所以注意一下，最得第一部機時，確保身上21-30格不存在道具，否則會喺取得第二部機前，果十格出現嘅道具將會暫時隱藏，直到取得先會出現返。
*去到哩度
檔案島上全部野外Digimon 攻略完畢
返去同爺爺獸認叻，佢話你好叻好叻真係好叻！然後親自頒哩個獎品：「100繁榮度」金牌畀你
Check Point 17 – 裏次元
完成所有表關遊戲後，亦選擇繼續留喺檔案島，玩裏關遊戲。每年機械邪龍獸都會係唔同地方，產生裏次元，等你可以繼續喺裏面挑戰最終戰前強勁Digimon。當然學到勁招先係重點，入嘅Digimon 係有大量強大技能可以學習。
*裏次元隨機出現地點: 冰封聖域，闇貴族之館，玩具城，奧加獸山寨，比多森林
